एदे फोटू ल चपक के मुख्य पेज म लहुंटव—

गुरुवार, 20 अक्तूबर 2016

एनीकट ले रेत के अवैध दोहन करइया उपर होही कड़ा कार्रवाई: डॉ. रमन सिंह

अंजोर.बेमेतरा। मुख्यमंत्री निवास कार्यलय म आयोजित लोक स्वास्थ्य यांत्रिकी विभाग के समीक्षा बइठका के आयोजन करे गे रिहिसे जेन म ये बात के खुलासा होइसे के लोगन मन एनीकट के गेट ल फोक्टे-फोकट खोल देथे अउ पानी ल बोहाय के बाद उंहा ले गुपचुप रेती निकाले के काम करथे। अइसन करसतानी के सेती जरूरतमंद ल पानी नइ मिल पावय अऊ रेती के दोहन होथे। मुख्यमंत्री ह जानबा होय म अइसन लोगन उपर कड़ा कार्रवाई करे के निर्देश दे हावय। बेमेतरा के गिरत भू-जल स्तर के फिकर करत ओमन कम वर्षा वाले मुंगेली, रायपुर, महासमुन्द, बलौदाबाजार-भाटापारा जिला म निस्तारी के पानी पूर्ती काराये खातिर कार्ययोजना बनाये के बात कहे हावय। बइठका म ग्रामीण क्षेत्र कें स्वीकृत समूह जल प्रदाय योजना अउ शहरी क्षेत्र के नल-जल योजना के कामकाज के जानकारी तको ले गिस। 
छत्तीसगढ़ सरकार ल राजस्थान ले मिलिस 'हेल्थकेयर सम्मिटÓ एवार्ड
अंजोर.रायपुर। गैर संचारी रोग के रोकथाम म मिलत गजब सफलता खातिर छत्तीसगढ़ सरकार के स्वास्थ्य विभाग ल राजस्थान सरकार ह राष्ट्रीय पुरस्कार ले सम्मानित करे हावय। केन्द्रीय स्वास्थ्य राज्य मंत्री फग्गनसिंह कुलस्ते ह जयपुर म आयोजित एक कार्यक्रम म छत्तीसगढ़ के स्वास्थ्य विभाग ल दुसरइया 'हेल्थकेयर सम्मिट एवार्डÓ ले सम्मानित करिन। जानबा होवय के छत्तीसगढ़ सरकार के स्वास्थ्य विभाग कोति ले जनस्वास्थ्य सहयोग केन्द्र गनियारी बिलासपुर के तकनीकी सहयोग ले गैर संचारी रोग के रोकथाम खातिर बहुत अकन कार्यक्रम चलाए जात हावय जेकर बने परिणाम के सेती सम्मानित करे गे हावय। 
जबरन चंदा, सड़क म पंडाल म अब पुलिस कार्रवाई होही
अंजोर.कोरबा। कोरबा जिला अपर कलेक्टर के सियानी म पाछु दिन शांति समिति के बइठ बलाये गे रिहिसे जेन म तिहरहा सिजन म लोगन ल शांति व्यवस्था बनाये राखे म सहयोग करे के अपील करे गिस। अपर कलेक्टर ह किहिन के सड़क म कब्जा करके दुकान के आगू सामान रखना, पंडाल लगाके रद्दा जाम करना अउ आस्था के नाम म लोगन ले जबरन पइसा वसूली करना या फेर चंदा बर दबाव बनइया उपर अब पुलिस कार्यवाही करे जाही। संगे-संग पंडाल म बिजली विभाग ले अनुमति ले बिगर लाईन नइ खींचना हावय न ही ज्यादा आवाज वाला फटाका फोड़ना हावय। तिहार ह आपस म भाईचारा ले परंपरा के अनुसार मनाये ले ही सफल होथे न की उत्पात मचाये ले। बइठका म स्वास्थ्य अउ चिकित्साधिकारी मनला तको चेताये गिस के अस्पताल म डॉक्टर अउ स्टाफ के ड्यूटी पूरा रहना चाही। तिहरहा सजिन ल देखत अग्निशमन विभाग ल तको सचेत रहे के निर्देश दे गे हावय। बइठका म शांति समिति के सदस्य मन कोति ले तको  सुझाव दिए गिस के नवरात्रि अउ दशहरा के मउका म शहर के मुख्य मार्ग के मरम्मत, सड़क के बंद लाइट ल सुधारे जाये संगे-संग ज्यादा रात ले खुल्ला रहइया दुकान उपर तको कार्रवाई होना चाही। 

कोई टिप्पणी नहीं:

एक टिप्पणी भेजें